طـق حَـنـَك الحلقة الثالثة.. “البراطيل بتحل السراويل”

التاج الإخباري – موفق الرياحنة

أبو فلان ماط بوزه ومش عاجبه حال الولد.. على اساس أنه هو اللي رح يعدل حال البلد 
بقول درَّسناه بالجامعة لبكره يكون السند.. واشوفه كل ما مرت الأيام هبط حيله وقعد 
ابن فلان توظف وصار وتصيَّر وفلوسه مالها عدد.. معقول معموله حجاب وانطرق عين وانحسد
أصلاً اللي مثلنا كل ما شافه الشيطان شرد

ومرت السنين ودارت الأيام وأبو فلان ينطر أنه هالولد يتوظف حتى يزوجه ويخلص من همّه ويركن على حاله ويفتح بيت ويفرح فيه.

ويوم من الأيام قرر يروح على مضافة المختار منه يسهر ومنه يطيِّر الزهق وبلكن على الله شاف حل للولد فعلا دخل على مضافة المختار وكانت السهرة عامرة وكان من ضمن القاعدين واحد لابس بدله وعليه العين يسولف والقاعدين يسمعوله وصار يعمل من البحور مقاثي.
 
المهم قاطعه ابو فلان وحكاله مسا الخير يا ضيف انا شايف من كلامك انك شي مهم بالدولة 
رد عليه الضيف.. تفضل يا حج سولف اللي بدك إياه
ابو فلان.. والله يا عمي اذا تقدر توظفلي هالولد ما خليت ولا بقيت واحد إلا ودخلت عليه ومش زابطه معي !!
الضيف.. بسيطة يا حج هاي رقمي وبكره رنلي بعد الظهر وابشر 
ابو فلان أخذ الرقم وكمّل السهرة وروّح على بيته وقبل ما يحط رأسه عالمخدة سمع صوت طرق الباب وصار ينادي مين عالباب، رد عليه الطارق، وقال هاظ اني ابو علي افتح بدي إياك بجوز كلام.

يا ساتر وش السالفه وصار فكره تودي وتجيب..

المهم فتح باب الدار ورحب وهلا بأبو علي وقاله.. خير يا ابو علي 
ابو علي :سمعتك تسولف مع البيك عن ولدك وانك بدك تشوفله وظيفة 
اه والله يا ابو علي مثل ما سمعت 
ابو علي: اذا بدك الولد يتوظف وتنحل مشكلته من شروشها بدك تدفع لأنه البيك واحنا طالعين حكالي اخبرك 
لأنه بقول الفلوس مش إله الفلوس رايحه بطريقها وتعرف هاي مشاوير وبدها فت قروش
امممم يعني فكرك قديش بده خيوه!!
ابو علي: مش اقل من ٥٠٠ نيره
لأنه هالايام المثل بقول البراطيل بتحل السراويل
وعماااار يا بلد