التاج الإخباري – رثت النائب ريما العموش والدتها بكلمات مؤثرة استذكرت فيها فقدها لها والذي يصادف تاريخ اليوم 10/4 بالكلمات التالية:
"كان يوم عادي بس فيه شي كئيب
صحيت على سرير المستشفى بعد ما مر اسبوع….مليت السرير والشراشف البيضا
((اليوم انتِ احسن وبكره خروج، عشان هيك رح نجيبلك قهوة تصحصحي))
انطلب فريق الإنعاش على سماعات المستشفى للطابق الرابع… في شي مش مريح…الصوت دايما يوصل للاذن هالمرة وصل الصوت لقلبي..السرير صار جمر…قاومت اي شعور سئ.
اجى اخوي واجاني الجواب، وجهه اسود ومخنوق.
((اش في؟؟))
((امي تعبت من الدنيا))
طلعت صرخة جمعت كل الناس بس ولا حدا قدر يجاوب سؤالي
((لمين تركتني؟؟))
رحت حاولت اصحيها ما ردت علي
تصير زي الرجل الآلي تتحرك بس مش مستوعب
رجعنا على البيت
((جبتوها ياريما؟؟))
((جبتها وجبت كسر قلبي))
وجه هااااااادي ودعناها وراحت
فقدت الدعاء الي حاميني ووصلني لهون
وفقدت الي كانت تستناني كل يوم أربعاء
وبعدها تغيرت كل اعدادات الحياة
وبعد ما كنت أصغر وحدة بالعيلة وبالعالم بهداك اليوم كبرت ١٠٠ سنة
وهاد هو يوم ٤/١٠ اليوم الاسود"
