مقالات

يا حكومات اتقوا الله

التاج الإخباري

كتب لؤي أبوعصبه

12 عاما من المعاناة لوين بدكم تودوا البلد

جلالتك مافي حكومة مسكت البلد من 2009-12-14 وجاي الا دمرت اخت البلد وابناء البلد وياريت نعرف شو السبب ؟؟!!!

من عام 2011 تبدلت فيه 13 وزارة بستة رؤساء وأكثر من مائة وزيرجديد ومازال الشارع لم يكل احتجاجا على سياسات الحكومة وعلى فساد لم ينضب

جلالة الملك بقول نحد من الواسطات والمحسوبيات بتنطلك وزيره بتقول بتبالغوا بالكلام عن الواسطات والتوظيف عن جنب وطرف برواتب خيالية وهناك ناس بتترجى تشتغل بمئتان وخمسون دينار علشان يقدروا يعيشوا .

جلالة الملك بقول خففوا اعباء على المواطنين بتغيب الحكومه اسبوع وبتطلع بقرارات بتضحك لدرجة انه لا مجال لاصلاح اي قطاع حاليا لا من ناحية الاجارات او البضائع او البيع او الشراء، وصغار التجار اغلقوا اعمالهم، وبحملونا جميلة انهم خلوا المطاعم فاتحة والدليفري شغال للساعه 2 بالليل، وبهيك انعشوا قطاع المطاعم وشركات الديلفري، والباقي معلش يجوع ومايلاقي شغل.

جلالة الملك بقول سرعوا باستيراد واعطاء المطاعيم ، بطلعوا بحكوا ٥٠٠ الف اللي مطعمين وفي مليون ونص مقدمين !!!!!!! طيب شو بتستنوا ؟؟

حرص جلالته المتواصل لتوفير عيش كريم للمواطن الأردني والتخفيف من معاناة ذوي الدخل المحدود والمتدني وتحسين نوعية معيشتهم وبالمقابل جشع كبار التجار ما اله حدود ولا حدا قادر يوقفهم بالبلد ؟؟؟ ووظائف مافي !!!

جلالة الملك طالما دعا الى الشراكة مابين القطاع العام والقطاع الخاص والحمد لله القطاع العام بحارب القطاع الخاص ليش بنعرفش!!!!

المناقصات الحكومية@@ حدث ولا حرج … مفصلة تفصيل لأكم واحد والباقي يبلط البحر
كل قراراتهم عكس اوامر جلالة الملك

مشروع الباص السريع دمر عمان وعمل ازمات سير خانقة عداك عن الأضرار المادية الكبيرة للمحلات والتجار شو فايدته جد ما بعرف ؟؟؟؟

عمان شوارعها بتخزي هي واشاراتها وطرقها ومخططاتها، طبعا حدث ولا حرج عن باقي مدن المملكة

استغوال شركات الاتصالات والكهربا والمياه بدون رقيب ولا حسيب ؟؟

زراعه وأمن غذائي ما في ؟؟؟

بنيه تحتيه معدومه ؟؟؟ شوية مطر بتغرق البلد وبتتسبب بخسارة الملايين من الدناناير للمتلكات العامة والخاصة.

ضرائب اعلى من دخل الفرد !!!

كله كووووووم ووزارة الاوقاف كوم ثاني ، تاركين دين ربنا وبلشانين: الاكسجين لا يفطر والمطعوم لا يفطر وتحديد دقائق صلاة التراويح وصلاة الفجر ، حتى الدين كيفوا على هواهم !! حزنان عليك يا معالي وزير الأوقاف

وزارة العمل بعملوا قوائم القطاعات المتضررة وبتتفاجأ بأقوى قطاع اقتصادي موجود وهو قطاع المدارس من ضمن القطاعات الأكثر تضررا ……. ياحرام اولياء الأمور الأقساط زي ماهي والمدرسين خفضوا رواتبهم

بقلك اجازة العيد بتبدأ يوم الثلاثاء 28 رمضان، علشان الي معاه مصاري يرتب اموره ويجهز حاله والي ما معه يروح على الحدائق العامة الي تكرمت الحكومة بفتحها علشان الشعب يتمرجح وياكل شعر بنات

كل المسؤولين بالدوله ماشيين تماما عكس توجيهات سيدنا وبكل اشي نفسي اشوف توافق واحد بين تعليمات جلالة الملك واي حكومه او مسؤول

شكر خاص للأجهزة الأمنية والجيش على نعمة الأمن والأمان وبيجيك وزير بقلك الأردن تتبع السياسة الناعمة والقوى التي نمتلكها والوصاية الهاشمية هي قوة ناعمة ونحن لا نمتلك صواريخ ولا دبابات !!!!

مقالات ذات صلة

زر الذهاب إلى الأعلى