رسالة من أم الشهيد محمد الهياجنة إلى أم الشهيد محمد خضيرات

التاج الإخباري – وجهت أم الشهيد محمد هياجنة أم يزن رسالة إلى أم الشهيد محمد خضيرات أم أنس ..
والتي لم يسعفها المشاركة بهذا المصاب الجلل والسبب دخولها إلى المستشفى ، وحالتها المرضية تستوجب عدم مغادرتها من المشفى لحين الشفاء التام ..
لكنها بعثت هذه الرسالة لتصل إلى أم الشهيد محمد خضيرات قائلةً :

“أم أنس كيفك ؟ كيف أمورك ؟ بتعرفي انه انا قبل فترة عشت اللي انتي هسا بتعيشيه وحسيت انها الدنيا خلصت وسكر كل شي بوجهي وشلت هم الحزن ولبست ثوب الألم وكل يوم بخطر ع بالي وبيجي يزورني وانا راسي ع المخدة وبسولف معي ومرة بنضحك ومرة بنبكي .. أم أنس سُقت عليكي الله تظلي تدعيله ولا تبكي وخليكي قوية ، ع الأقل انتي في عندك ريحة منه بناته ، اما انا يا ويلي عليه ما لحق يتجوز واشوف اولاده .. صحوني وقالولي يُمة عارفة شو صاير بالدير !! في واحد مستشهد ،، قلتلهم بالله ما هو محمد ، محمد ابني ما انا عارفة ، فكرت انها السنين اللي راحت حلم واليوم راح ابني ،، قالولي لا يُمه هو صحيح اسمه محمد بس مش ابنك ، وبلشن دموعي ينزلن وكأنه ابني خبر شهادته اليوم مش من قبل ، بكيت ع ابنك يا ام أنس ، وشفت بعيونه ابني ، تعبت يا أم أنس من فراقه واللي مصبرني إنه بالجنة مصيره وبكرا بيجي يوم وأشوفه ..

صعبة يا أم أنس بس أصبري وظلك تذكري انه بالجنة عند اللي أحسن من كل العالم ، صعبة ، بس انتي يا أم أنس كل ما تشتاقيله بتمسكي وحدة من بناته وبتحضنيها وبتشمي ريحته ، أنا كل ما اشتاق لإبني بقلب الصور ع التلفون وبقعد أبكي ، ببكي لأني مش قادر أشم ريحته .. يا أم أنس إدعيله ظلك إدعيله ،، انا وانتي ام الشهدا شو بدنا احسن من هيك شو بدنا احلى من هيك تكريم من ربنا ..
اللهم إرحمهما وأسكنهما فسيح جناتك مع الأنبياء والشهداء وحسن أولئك رفيقا ..”