أبو عمارة يكتب: كابوس مفزع!
التاج الإخباري – بقلم الدكتور محمد أبوعمارة
يا الله معقول.. الحكومه استجابت لمطالبات الشعب ونزلت أسعار المحروقات 20% معقول، آه والله يا شيخ وكمان في خبر بيهمك أكثر..
– خير شو هوي؟
– كمان رجّعوا التوقيت الشتوي وطلع رئيس الوزراء المحبوب الطيوب وحكى حياة الطلبة وراحتهم أهم من كل خزينة الدولة، وإحنا خدامين الشعب.
– معقول يا زلمه!!
– آه، والله
– حكى إحنا خدامين الشعب!
– نعم حكاها..
– يا الله فرجك يا رب، طب وعنجد نزل سعر المحروقات؟
– نعم وحكى شعارنا في هذا العام شتاء دافئ لكل مواطن والعجيب انه كمان وفّر مبالغ ضخمة للأسر المستورة اللي ما عندها قدرة على شراء الكاز..
– لا لا مستحيل!!
– والأهم إنه اقسم بالله إلا يطارد الفساد والمفسدين وين ما كانوا بالعالم ،،،وكمان اشترى أجهزة استكشاف وطائرات قناصة مشان تداهم الإرهابيين وحكى إنه أرواح جنودنا أبطال الجيش العربي مش لعبة ودمهم مش رخيص ومستحيل نضحي بجندي من جنود الوطن فاشترى أجهزة تحكّم عن بُعد بتطارد الإرهابيين مثل اللي بنشوفها مع الأمريكان وبتقنصهم قنص …ولا يا رجل شو بتفكر ولسه لو أحكيلك في أشياء كثيرة..
واستيقظت مفزوعاً من هذا الكابوس الذي كنت أحلم به شربت الماء وتصفحت مواقع التواصل لأجد أربعة شهداء بمطاردة الإرهابيين… والمحروقات أسعارها بإزدياد والفساد في أبدع أوقاته والفقراء في طريقهم للموت من الجوع والبرد، حمدت الله على نعمة الحكومه والأيام الأجمل التي لم تأت بعد لأن جمال الانتظار أفضل من تحقيقه حسب رأي الحكومه الرشيدة ورئيسها الحكيم
وعدت لأكل نومي لأحلم كيف سأوفر طعام أولادي في يوم الغد..
