ثقافة وفن

رانيا محمود ياسين: والدي فهمني الحياة غلط

التاج الاخباري– تحدثت الفنانة المصرية رانيا محمود ياسين، عن تكريم والدها الراحل في المسرح القومي، مشيرة إلى أنها كانت تتمنى أن يحضر الفنان الكبير هذه اللحظة، بسبب عشقه للمسرح.
وقالت رانيا في لقاء خاص : “أنا عارفة إنه حتى لو كان والدي عايش وهو مريض، مكنش هيقدر يحضر، وأنا اللي كنت هستلم الجائزة أو شقيقي محمد، بس على الأقل لو كان موجود، كنت هروح البيت وأوريله الجائزة، إنما دلوقتي لا يمكن هقدر أفرحه، ودي حاجة صعبة بالنسبالي شوية”.
وتابعت: “مش هعرف أحكي عن أبويا تفاصيل كتير، بس هو كان استثنائي، مش شبه حد، طيب أوي وحنين أوي، وكتير قولتله إنك فهمتني الحياة غلط لما نزلت الشغل واحتكيت بالناس اكتشفت ده، فهمتني إن الدنيا كلها زيك، بس الحياة مش كلها زيك، فكان بيقولي (بس إنتي لازم تبقي زيي) وأنا بالفعل بحاول أبقى زيه، بس لسة بدري، مش هعرف أوي أعمل ده”.
وعن النصائح التي كان يوجهها لها باستمرار، قالت: “مكنش بيحبني أتخن، دايما كان يقولي كده، وخلي بالك من شغلك، كان بيهتم جدا بمخارج الألفاظ، والحرص على الشغل والالتزام، بس أول حاجة قالهالي إن بيتي لازم يكون رقم واحد في أولوياتي، وده يمكن اللي أخرني شوية وعطلني في الفن، بس أنا مش ندمانة، لإن دي نصيحته ليا”.
وأردفت الفنانة المصرية: “أنا بحس بقيمة نصيحته دي، لما بشوف طبيعة علاقتي بأولادي وإني مصاحباهم، وحاسين إني قريبة ليهم، أنا اتجوزت وخلفت وأنا صغيرة، ووقفت جنب جوزي في بداية حياته لحد ما عمل اسمه وتاريخه، لو كان البيت مشتت وبايظ يمكن محمد رياض مكنش هيبقى في الحتة دي، أو حال أولادي كان هيختلف”.
وأكملت حديثها قائلة: “دلوقتي ممكن أعوض ده في شغلي، أه بعاني علشان أقدر أرجع، بس مش مشكلة لإن دي نصيحة والدي”.
وعن حالة والدتها الفنانة المعتزلة شهيرة، عقب وفاة محمود ياسين، قالت: “مش مستوعبة خالص وفاة والدي لغاية دلوقتي، كانت بتعيط وأنا فاتحة لايف من مهرجان المسرح القومي، مكنتش قادرة تيجي وقالتلي لو كنت جيت كنت هعيط، وكان ممكن أبوظ الحفلة”.
وعن إصابة زوجة شقيقها السيناريست عمرو محمود ياسين وأولاده، بفيروس كورونا، قالت: “الحمدلله بيتعافوا دلوقتي، وهو كويس معندوش حاجة الحمدلله”.
وعن التعليقات السلبية التي تطاردها من بعض المتابعين على السوشال ميديا، قالت: “مركزين معايا لإني وأنا شغالة في الإعلام كنت قرفاهم في عيشتهم، فهما بيحبوا يضايقوني كل فترة، بس مش فارقين معايا، أنا عارفة بعمل إيه وبتصرف إزاي”.

مقالات ذات صلة

زر الذهاب إلى الأعلى