مقالات

الزميلة ساره دراوشه : ارجوكم مش كل الإعلام كاذب

التاج الاخباري -كتب -سارة درواشة -مهنتي كإعلامية متعددة المهام ، الحمدلله ربنا اكرمني بأغلب المفاتيح الي بقدر اكون فيها اعلامية ناجحة ومقدمة اخبار وبرامج ومراسلة ميدانية وكاتبة وباحثة ، وتعمدت اني احكي ناجحة لاني فعلا نجحت بكتير امور الحمدلله وصار عندي اسم بفتخر فيه ، وطبعا هاد الشي ما اجا لحاله وانا عم بشرب النسكافيه ع الشباك وهي بتمطر وبستنى الفرصة تيجي لعندي ، لأ هاد صار من خلال سعيي الدائم بالتطور والتطوير  ، وهاد الشي ما خلاني اغتر بنفسي ابداً ولكن خلاني عارفة قيمة نفسي ومقدريتها 
 

انا بعتبر  مهنتي رسالة وهي فعلا رسالة لازم نوصل فيها صوت الحق ، وللاسف احيانا بنتحدد متلنا متل اي حدا بعدم طرح مواضيع حساسة ، ممكن انها تعمل زعزعة او شوشرة ، وهاد شيء احيانا بكون صحيح وافضل ، بس عن حالي ما بسحج ولا بنافق ابداً ابداً ، فلما كتير ناس اشوفها كاتبة وشاملة انه اعلامنا بالبلد اعلام كاذب ، بدايق والله وبدايق اكتر انه فعلا في ناس بتشتغل بمهنة الصحافة وفعلا سحيجين ومنافقين ، عم بخلو الخير يروح بعروة الشر ، الي بيشتغلوا بالاعلام من المفترض يكونوا ناس موهبين بالفطرة لحتى يقدروا يكملوا .

الاعلام مش هواية ، الاعلام موهبة لأنه في جوانب كتير لازم تكون موجودة فيك بالاساس ومع التمرين والخبرة بتطور اكتر واكتر وكل الناس بتعرف هاد الشي ، الكاميرا مش بس شاشة بالنسبة النا ، الكاميرا حدث بنوثق فيه رسائلنا وبننقل عبرها صوتكم ، وقلمنا مش شعر او نثر بنكتب فيه الكم ، قلمنا الوسيلة الي بننقلكم فيه الصورة بأبسط الكلمات ، فأرجوكم مش كل الاعلام كاذب، ومش كل حدا اشتغل بمهنة الصحافة يطلق عليه لقب صحفي او اعلامي ، في ناس هواة وصدقوني ما بيآمنوا بنفسهم ابداً ولا بيعرفوا قيمة نفسهم ، وفي ناس بتسهر وبتتعب وبتكرس كل وقتها منشان توصل صوتكم…. انا كتير معتزة بمهنتي وبتشرف كتير فيها ، وبعتبرها بالنسبة الي افضل مهنة على الاطلاق وهاد رأيي انا طبعًا…. وشكرا لكل الناس الي بتآمن فيي وبتحب دائمًا تتابعني ♥️
وبعتذر على الاطالة 

مقالات ذات صلة

زر الذهاب إلى الأعلى