مقالات
يوميات مدير مدرسة حلقة (٢٢)
التاج الإخباري- د محمد أبو عمارة
في مساء أحد الأيام، استقبلت اتصالاً من أحد الآباء ….
- دكتور ، مساء الخير ….
- يسعد مساك حبيبي …
- دكتور ، مش أنا أب لطالب بمدرستك !!!
- صحيح ، ما شاء الله عنه ابنك !!
- دكتور ،، و مش من حقي أتابع كل صغيرة و كبيرة لفلذة كبدي !!؟؟
- طبعا.. من حقك !!!
- دكتور ، و انتو مدرسة محترمة و رائعة .. و فعلا بتهتموا بالطلبة و هاي شهادة شكر مني إليكم …
- أشكرك يا سيدي …كلماتك تاج فخر لنا، تفضل أؤمرني ؟
- و بناء على ما تقدم و بدون سبق إنذار .. لقيت حالي و فجأة ضمن جروب على الواتس أب تابع للمدرسة اسمه ( ماميز (mummies
- عفوا !!!! مامييز !!! و إنت شو دخلك!!!
- والله يا دكتور ما أنا عارف يمكن رضا والدين و أرزاق و الحمدلله كنت يومها مصلي الصبح حاضر بالمسجد و شكله الدعاء جاوب ..
- بس أنا بعرف إنه الجروب فقط للأمهات ؟؟طيب!!! و ليش زعلان ،حد زعلك من جروب ماميز !!
- لا يا دكتور ما حد زعلني بس المشكلة يا دكتور !! كنت مع الجروب و مبسوط ، و أصلا أصحى من الصبح من الفجر أو من قبل الفجر ، مشان أتطمن على أطفالنا، و ابني و مستقبله ، و أسمع شو بيحكوا الأمهات عن المعلمات و الساندويشات و حتى شو الطبخات ،، و الأمور لوز اللوز ..
- شو طابخاااات !!! هم بيحكوا بهيك مواضيع خاصة على جروب عام!! طيب انت ليش زعلان ؟
- زعلان لأنه في جاسوسة عندك بلغت مرتي بأنه رقمي أنا اللي موجود بالمجموعة و مش رقمها هي
- أيون !! و بعدين !!!
- و الله يا دكتور ، حرب و بدت و تحقيق .. و سين وجيم شو قرأت .. و مع مين حكيت … و ليش قاعد بتتنصت على الأمهات … و فجأة لقيت حالي خارج الجروب !! و دخلوا مكاني مرتي !!! و من هداك اليوم المشؤوم و أنا يا دكتور بشعر بالوحدة و البرودة و الضجر و الزهق ! أتاري الجروب كان مملي علي حياتي يا دكتور وكنت بلاقي فيه الجزء اللي ناقصني ،و فعلا مش عارف شو بدي أساوي و أسئلة كتير في بالي بحاجة إلى إجابات!!
- تفضل .. أنا بجاوبك
- ما بنفع يا دكتور صدقني
- لأ ، بنفع انت بس إسأل
- طيب يا حفيظ السلامة ….. أولا : شو صار مع إم سمير لما كبست الخيار، بطريقة أم تيم ، زبط و لا ما زبط !! و بالنسبة لجوز (غيد) بعد ما مسكته بأرجل مع شلة مش مزبوطة و هرب من البيت رجع ولا ما رجع !!! و شو صار بالحلقة رقم (6525) من المسلسل التركي !!! و بالنسبة للصيفي و الشتوي ! متى أحسن وقت لتنزيل الشتوي و نرفع الصيفي …و ……
- خلص … خلص يا رجل
أنا فكرتك حابب تعرف شو بيصير مع إبنك ، أوراق عمل ، امتحانات ، جداول ، مسابقات ،،، أما شو طبخت سميرة !!!! و شو لبست منال !! و الله عيب هالحكي ،، عيب !! و مرتك معها حق تحاسبك …و رجاءً سكر السماعة و ما ترنلي مرة تانية ،، و أغلقت السماعة و استدعيت المس (ريم) منسقة القسم ، و استجوبتها عن هذا الخطأ !! و بررته بأن رقم الوالد و هو المكتوب مكان رقم الوالدة !! أي أن أم الطفل قد أخطأت بإدخال البيانات، لذا تم هذا الخطأ ….
و بعد ذلك ناديت (ريم ) و سألتها : مس ريم ، سؤال لو سمحت - تفضل دكتور
- ريم، شو صار مع جوز (غيد) بعد ما مسكته مرته مع شلة مش مزبوطة و هرب !! رجع للبيت ولا لأ!!!؟؟
بقلم الدكتور : محمد أبو عمارة
رئيس جمعية الكتاب الالكترونيين الأردنيين
